ഈ മഴ തോരാതിരുന്നെങ്കിൽ

കുടയുമെടുത്താരും കാണാതെ മുറ്റത്ത്
ചെറുചാലുകളിൽ മണ്ണണ തീർത്ത്
വെള്ളം അണപൊട്ടി ഒഴുകുന്നത് കണ്ട
ഒരു മഴക്കാലമുണ്ടായിരുന്നു.
മഴ നനഞ്ഞ് പനി പിടിച്ച്
പുതപ്പിൽ ചുരുണ്ടുകൂടി,പിന്നെ
മുത്തശ്ശി കാച്ചിയ ചുക്കുകാപ്പിയുമായി
വീണ്ടും ഉമ്മറത്ത് മഴ നോക്കിയിരുന്ന കാലം.
നനഞ്ഞ കോലായിൽ വരാന്ത മീതെ
തണുത്ത കാറ്റിന്റെ താളത്തിനൊത്ത്
ചുവടുവയ്ക്കാൻ കൊതിച്ച കാലം.
നനഞ്ഞ മണ്ണിന്റെ ഗന്ധം നുണഞ്ഞ്,
നനുത്ത മഴതൻ തലോടലേറ്റ്,
ഒരു ചേമ്പിലതൻ മറയ്ക്കു കീഴെ
ഒരുമിച്ചൊരായിരം കനവുകൾ നെയ്യാൻ.
രാവിലിരുട്ടത്ത്, മെഴുതിരി വെട്ടത്തിൽ,
രാമായണക്കഥ കേട്ടിരിയ്ക്കാൻ,
കടലാസുതോണിയിൽ ചോണനെ കേറ്റാൻ,
കാട്ടിലെ ചീവീടിൻ പാട്ടൊന്നു കേൾക്കാൻ,
വീണ്ടും ഒരുമിച്ച് നനയാൻ,
ഈ മഴ തോരാതിരുന്നെങ്കിൽ